主页 > K校生活 >【轮证赢家】财不入急门 >

【轮证赢家】财不入急门

【轮证赢家】财不入急门放大图片

噚日只进取恒指熊(55811)同安全距离恒指熊(55832)全数Day Trade成功,但基于噚日恒指向下杀咗三层牛证街货之后,都要睇睇啲街货点样重新部署先再谂下一步做乜,于是收割之后就係等收工,跟住再等够钟离开公司,同两位老友强少同蓝哥,再加埋强少爱妻四条友去鸡煲,好彩呢三个后生仔都仲肯同我呢个几廿岁出嚟玩啫。

依家9点55分,返到公司又沖定杯靓茶开晒电视电脑,可能噚晚开心得滞,再加埋今日Happy Friday,lunch都未食就已经有种放假mode;唔止我係咁,个市都係咁,开市到依家见日线图粒烛严格嚟讲应该係「倒T星」,但佢支脚短到呢...骤眼睇仲以为係一条横线,好似啲轮图无成交咁款,不过还好嘅係仲叫做喺条20天线/保历加通道中轴(26393点)上面,而下方SlowSTC(14,3)仍然都係下行中,但留心14RSI反而有少少势头向上,唔通呢个就係10天线(26856点)升穿50天线(26811点)嘅「黄金交叉」威力?

开埋恒指牛熊证街货图睇先,原先噚日估下方牛证26000至26099点有机会变成重货区,无其他嘅,纯因为整点数位嘛,但结果今日见到呢一层只有相当于357张期指,重货区仍然係25800至25899点,有相当于907张期指。而牛证最贴价嘅26300至26399点就有相当于652张期指,总数唔多但新增嚟讲係最多。

至于上方熊证无新增区域,但26900至26999点呢层最贴价嘅就变成重货区,有相当于689张期指(...嗯...我唔係咁锺意呢个冧把...),同最贴牛证区一样,都係最多新增街货层。

依家10点6分,恒指做紧26519点,升50点,暂时波幅只有112点,而呢个位又同牛熊街货中间位[(26900+26399)/2=26649.5]相差130.5点,若然话20天线见短线支持弹起嘅话,倒不如真係见到佢有力先至再出手都未迟,反正拆恒指5分钟图见喺10点5分时SlowSTC(14,3)落到中轴水平时又再次弹起,呢个位无论牛定熊都唔係入市靓位(再弹返起就更加唔会係入牛博20天线反弹嘅时机);更何况恒指企喺中间位应该大把人落注,就睇吓人哋点落注先啰,唔急嘅。

作者阿珊,任财经/投资版传媒人十几年,《钟摆战略赢港股》作者。用技术分析专心玩轮证,唔贪心,志在搵餐下午茶。

电邮:[email protected];FB:轮证赢家

上一篇: 下一篇: